ساعة وتغيب الشمس
ساعة ويجيني الليل
وينراد حيل ودمع
ومنين اجيب الحيل
روحي حمامة صُفت
وبيت اهلي تدور
اشتاكيت لامي انا
ولخبزة التنور
بديرة هلي بالطعم يختلف حتى المي
وحتى الهوى يم هلي يختلف والله هواي
كل ليلة تسوى العمر
لوكعدوا اهلي وياي
ومن ايد امي الصبح
محلا استكان الشاي
يامنطقتنه حلم ارجع لاصحابي
كل ساعة صاحب يجي
ويدك علي بابي
محتاج محبوبتي
الحلوة ام جفن غافي
واتمنى هسى تجي
وتغفى على كتافي
مشتاق للمدرسة
للجرس والساحة
اطفال نركض ركض
بس نشعر براحة
اشمادار بي الزمن
ابقى لاهلي ميال
ومنين اجيب كلب
يتحمل الترحال
